Një ditë më parë, me anë të një shkrimi, TIRANA TODAY hodhi dyshime se Kostandinos Kacifas ishte vetëvrarë. Minoritari grek humbi jetën të dielën, më 28 tetor në Vulgarat të Gjirokastrës, në kohën kur u rrethua nga forcat speciale RENEA. TIRANA TODAY e ngriti pretendimin e saj pasi mësoi se viktima kishte dy vrima plumbash në gjoks në distancën 2-3 cm larg njëri-tjetrit.
Sipas ekspertëve të balistikës, asnjë qitës, qoftë i RENEA-s, qoftë nga më të mirët e Botës, nuk mund të godasë me një precizion të tillë: dy predha në 2-3 centimetër katror. Duke përfshirë në argumente edhe të tjera të dhëna, siç është mospublikimi i asnjë informacioni nga ekspertiza, qoftë mjeko-ligjore, qoftë e policisë shkencore, TIRANA TODAY doli në përfundimin se Kacifas ishte vetëvrarë.
Pikërisht në favor të kësaj ideje vjen edhe dëshmia e mjekut ligjor grek Theodoros Vougiouklakis, i cili, në datën 31 tetor, u lejua për 5 minuta, në shoqërinë e një përkthyesi, të shihte kufomën në morg.
Sipas mjekut ligjor grek, cituar “Greek Reporter”, ai ka pasur mundësinë të shohë kufomën në morg duke e përshkruar me kështu: “Janë dy vrima plumbash në gjoks… Nuk të jepej përshtypja se është qëlluar nga afër… Trupi nuk ka dëme të tjera të dukshme në këmbët apo në duar… Në trup është ndërhyrë duke prishur informacione që mund të hedhin dritë për rrethanat e vdekjes… Trupi është larë dhe është qepur”.
Ndërsa shoqëruesi i tij, gjatë një interviste për Himara.gr (video më poshtë) tha se “dy vrimat ishin në zonën e zemrës”.
Pikërisht, këto dëshmi kanë një detaj interesant, i cili mbështet versionin e TIRANA TODAY. Dy vrimat në gjoks për të cilat flet doktori dhe sidomos, dy vrimat zonën e zemrës, që pohon shoqëruesi, sigurisht që të çojnë te argumenti se Kacifas është vetëvrarë. Gjithsesi, vetëm publikimi i rezultateve zyrtare të ekspertizës pritet të thotë fjalën e fundit. Sigurisht, nëse autoritetet shqiptare do vendosin t’i bëjnë ato publike. FE.DE. TIRANA TODAY
