Vrasja e ekstremistit grek në Bularat, Kostandinos Kacifas, u pasua nga një ‘lumë’ vrasjesh shqiptarësh në Greqi në rrethana të dyshimta. Kryepeshkopi Anastas Janullatos teksa ka sqaruar qëndrimin e tij në lidhje me vrasjen e minoritarit grek dhe shqiptarit në Greqi, Petrit Zilfa, ka zbuluar se merr kërcënime nga grupe të ndryshme ekstremistesh, greke dhe shqiptare.
REAGIMI I PLOTË
Kisha Orthodhokse Autoqefale e Shqipërisë
Kryepeshkopi Anastas ka ngushëlluar të dyja familjet
Disa faqe interneti dhe gazeta shqiptare u ngutën të ribotojnë një artikull të z. G. Kapllani, që kishte si argumentin e tij kryesor një nënkuptim fyes, ku thoshte se Kryepeshkopi Anastas u interesua dhe shprehu ngushëllimet e tij vetëm për familjen Kacifa dhe se u tregua indiferent për familjen e Petrit Zilfës, që u vra në mënyrë të padrejtë. Ky pohim është krejtësisht i pavërtetë! Kryepeshkopi Anastas ka ngushëlluar të dyja familjet. Ai i shprehu ngushëllimet e tij familjes Zilfa, më 5 dhjetor 2018.
Ata që e njohin se si është e vërteta, e dinë fare mirë se Kryepeshkopi Anastas merr pjesë me respekt dhe dhembshuri në vuajtjen e njerëzve dhe përballet me ngjarjet, në heshtje dhe gjykim të thellë, pavarësisht kërcënimeve, që merr kohë pas kohe nga grupe ekstremiste të të dy vendeve. Qarqe të mirinformuara dhe objektive në Shqipëri dhe në Greqi, e njohin mirë faktin se, për 27 vite, Kryepeshkopi Anastas lufton për paqen, mirëkuptimin dhe respektin reciprok midis njerëzve dhe popujve.
