Ndërkohë që koronavirusi ndodhet në kulmin e tij, ekspertët kanë filluar të ngrenë shqetësimin për një tjetër virus të ri.
Sipas medias britanike, “The Sun”, mjekët në Britaninë e Madhe ka ngritur një shqetësim për një virus të ri, që po shfaqet tek fëmijët.
Në artikull shkruhet se Shërbimi Kombëtar i Shëndetësisë ka njoftuar ‘për një goditje’ të re, paralelisht me COVID-19, që po sulmon të rinjtë dhe fëmijët.
Media ndërkombëtare, referuar të njëjtave burime, shkruan se virusi i ri ka simptomat e koronavirusit, por grupi më i rrezikuar janë të rinjtë.
“Ka shqetësime se një virus inflamator i lidhur me Covid-19 po shfaqet tek fëmijët në Mbretërinë e Bashkuar. Gjatë tre javëve të fundit, ka pasur një rritje të dukshme të numrit të fëmijëve të të gjitha moshave që paraqesin një gjendje inflamatore që kërkon kujdes intensiv”, shprehen shefat e shëndetësisë.
Deri më tani, numri i fëmijëve të prekur ka qenë i vogël dhe kryesisht në Londër. Shoqata e Kujdesit Intensiv Pediatrik e ka ngritur këtë shqetësim që ditën e djeshme.
“Ju lutemi sillini fëmijët që paraqesin këto simptoma si raste urgjente”, thuhej në njoftim.
Mjekët paralajmëruan gjithashtu se rastet kanë tipare të sindromës së shokut toksik, që godet enët e gjakut dhe zemrën. Fëmijët mund të kenë ënjtje të brendshme, ethe dhe probleme me frymëmarrjen.
