Bashkëshortja e ish policit 26-vjeçar, i cili u vra mbrëmë në zonën e Xhamllikut në Tiranë, ka qenë pjesë e Forcave “Shqiponja”.
Santiago Malko ishte i martuar me ish-efektiven Dea Ricku, ndërsa nuk dihen arsyet pse Dea nuk vazhdon të qëndrojë më në radhët e “Shqiponjave”.
Ricku ka punuar për pak kohë si police e rendit në Komisariatin e Kamzës dhe më pas, në janar të vitit 2016, është bërë pjesë e “Shqiponja-ve”, duke qëndruar për disa muaj. Një vit më vonë, në 2017, Ricku ka vendosur të shkëputet nga policia me dëshirën e saj.
Malko u qëllua me breshëri plumbash, teksa ecte me automjetin e tij. Ai po ndiqej nga një furgon i bardhë dhe një mjet tjetër Mercedes Benz. Në kohën që ka ndodhur ngjarja, vendi ishte plot njerëz.
Autorët e krimit dyshohet se janë larguar në drejtim të fshatit Ferraj, ku dhe kanë djegur mjetin e tyre.
