Kryetarja e LSI-së, Monika Kryemadhi e pyetur në lidhje se si do përgjigjet opozita nëse të zgjedhurit do të zënë zyrat, iu shmang pyetjes duke u shprehur se deri në 12 gusht ka shumë kohë përpara.
“Aksioni do të jetë hap pas hapi, këtë javë është konsultimi ynë me partitë aleate. Do vazhdojmë gjithë procesin që do vijë në mënyrë të njëpasnjëshme. Nuk është problemi aty, tek zënia e zyrave, ata nuk do të shkojnë në zyrë asnjëherë. E di sa gjëra do ndodhin deri ën 12 gusht”, deklaroi ajo.
Kryetarja e LSI-së përsëriti qëndrimin e saj duke theksuar se edhe OSBE/ODIHR ashtu si opozita i mbështeten faktit se në 30 qershor nuk kishte zgjedhje por vetëm votime.
Kryemadhi komentoi edhe deklaratën e zëdhënëses së Komisionit Evropian, Maja Koçijançiç.
“Zonja që ka bërë deklaratën nuk e ka shkruar vetë, ia kanë shkruar të tjerët. Zonja nuk e ka të qartë që faktikisht ka një ngërç shumë të madh në atë që thotë. Ajo thotë të shkojnë në zyrë, kush të shkojnë në zyrë. Po kush?”, u shpreh ajo.
