Juventusi ka arritur të fitojë me përmbysje përballë Bolognas në “Allianz Stadiu” dhe tashmë çështja e titullit mund të quhet e mbyllur të shtatin radhazi, si askush tjetër në të kaluarën. Një fitore mjaft e vështirë duke parë që pjesa e parë u mbyll 0-1 në favor të miqve, që shënuan pas një 11 metërshi.
Një penallti e dyshimtë por e dhënë me vonesë dhe në një moment arbitri Irrati nuk po merrte konfirmim nga arbitrat e VAR. Ndërsa në atë moment u pa edhe presidenti i Juventusit, Agnelli që menjëherë nxjerr telefonin dhe komunikon me dikë, një gjest që ngriti shumë dyshime. Por penalltia u ekzekutua nga Verdy dhe me një gjuajtje me shumë klas mposhti Buffonin.
Gjithsesi, në minutën e shtatë të pjesës së dytë, një autogol i Sebastian De Maio i dha barazimin “Zonjës së Vjetër”. Kur u mbush një orë lojë, Sami Khedira largoi “makthin” nga skuadra e Allegri, duke realizuar golin e dytë për vendasit. 20 minuta para fundit, goli i 22-të i Paolo Dybala në këtë kampionat i çoi shifrat në 3-1.
Juventus ka shtatë pikë më shumë se Napoli i vendit të dytë, që do të luajë nesër ndaj Torino. Të mërkurën, Juve do të ndeshet me Milan në finalen e Kupës së Italisë, veprimtari të cilin e ka fituar 12 herë, tre herë radhazi.
