Në emisionin “Zonë e Lirë” të gazetarit Arjan Çani, janë të ftuar përballë njëri-tjetrit, juristi dhe gazetari Fation Shehu me gazetarin Dritan Shakohoxha. Çështja që do të diskutohet është për zgjedhjet në FSHF, ku Shehu mbështet kandidatin Bashkim Fino, ndërsa Shakohoxha për Armand Dukën.
Fation Shehu ka hapur debatin e shoqatave fantazmë dhe thirrjen në prokurori të personave përgjegjës, ndërsa nga ana tjetër Shakohoxha është shprehur se ata kanë dhënë shumë për futbollin shqiptarë dhe nuk e meritojnë këtë sjellje. Shehu ka ngritur akuza të rënda ndaj komentatorit të njohur, ku e quan si shitës të biletave drejt biznesmenëve të njohur dhe biletat ia siguron Armand Duka, duke bërë një biznes të mirëfilltë.
Shehu: Nuk kamë dalë në mbështetje të Bashkim Finos dhe nuk po bëj fushatë që ai të fitojë zgjedhjet. Ne u bashkuam rastësisht dhe jemi në një mision të vendosim drejtësi në FSHF. Mund t’ju përmend shumë skandale, duke filluar nga fondet, shoqatat fantazmë dhe fondet për kombëtaren, që nuk e keni idenë se çfarë shifrash të çmendura luhen në këtë mes. Me Finon nuk njiheshim më parë dhe na ka bashkuar e njëjta kauzë, që të dënojmë padrejtësitë që ka bërë Duka.
Shakohoxha: Jam me Armand Dukën pasi është i vetmi njeri që e njeh futbollin dhe ka ndërtuar një sistem mjaft funksional. Nuk mendoj se ka njeri tjetër që mund ta bëjë këtë punë aq mirë sa ai. Po ashtu do të ishte dramë që futbolli të kapet nga politika, pasi do të vinin dënime mjaft të rënda. Unë nuk jam dakord me këtë pjesë që policia të shkojë nëpër shtëpitë e këtyre ikonave dhe ti terrorizojë. Pasi Sulejman Mema më ka treguar se ishte tmerruar nëna kur kishte parë 4-5 polica tek shtëpia.
Shehu: Nuk ka lidhje se kush është apo çfarë ka dhënë. Në momentin që shkelet ligji të gjithë janë të barabartë dhe duhet të paguajnë për ato shkelje që kanë bërë. Domethënë ti po thua që s’ka gjë le ta shkelin ligjin këta se janë kanë dhënë kontribute të veçanta.
Shehu: Më vjen keq që ta them por ti Shako je duke u shitur bileta biznesmenëve në Shqipëri, ndeshje të Champions League dhe këto bileta ti siguron Armand Duka, është një biznes i pastër. Edhe biletat e avionit që shkon në konferenca e kudo që shkon Duka, sigurisht që ti paguan Federata.
Shakohoxha: Absolutisht që nuk është e vërtetë, unë një ndeshje dal minus nga lekët, pasi i marr biletat dhe iu dhuroj miqve të mi. Ca biletash avioni o Fation, më vjen keq por ato i paguan Supersporti, nuk ka lidhje fare FSHF. Nuk jam un kandidati apo ti, kështu që mos bëjmë fushatë.
