Shefi i Komisionit të Bashkimit Evropian, Jean-Claude Juncker ka shprehur shqetësimin për mundësinë e një lufte të re në Ballkan, nëse Shqipëria, Kosova, Maqedonia, Serbia, Mali i Zi dhe Bosnja nuk ndiejnë se BE-ja është serioze për ti marrë në familjen e madhe evropiane.
“Nëse në peisazhin tejet të komplikuar të Evropës krijohet përshtypja se ne nuk jemi seriozë në ofrimin e perspektivës së anëtarësimit në BE për vendet e Ballkanit Perëndimor, atëherë mund të shohim më vonë, e ndoshta edhe më shpejt nga sa parashikohet, atë që kemi parë të ndodhë në Ballkan në vitet ’90”, ka thënë Junker gjatë një fjalimi në Parlamentin austriak.
Gjashtë shtetet e Ballkanit, gjenden në faza të ndryshme të bisedimeve të anëtarësimit në Bashkimin Europian.Negociatat për anëtarësim kanë nisur zyrtarisht me Serbinë dhe Malin e Zi, ndërsa Shqipëria dhe Maqedonia janë ende në pritje të hapjes së negociatave prandaj klasifikohen si “vende kandidate”. Bosnja dhe Kosova, nga ana tjetër, janë vetëm “kandidatë potencialë”.
Qëndrimi i shefit të KE-së Junker është tashmë i njohur, se trazirat në Ballkan, mund të shuhen vetëm me anëtarësimin e shteteve në Bashkimin Evropian. Por Junker ka kujtur se shtetet Ballkanike ende kanë shumë punë për të bërë drejt rrugës së anëtarësimit.
Pati propozuar që shteteve të Ballkanit tu ofrojë një lloj “zone ekonomike, ku ato të mund të sillen pjesërisht si të ishin vende anëtare të bllokut”, që mund të zhvillojnë ekonomitë e tyre, transmeton Shenja. Sipas Junkerit, BE-ja duhet “të kujdeset për Ballkanin Perëndimor vazhdimisht, dhe të ndihmojë ku të jetë e nevojshme”.
