Nga: Marsela Sinani/ Në gjirin e Parlamentit tonë, të mbushur me çfarëdo lloj speciesh deputetësh, dëgjon shpesh një fjalor rruge, madje pa iu dredhur qerpiku. Ata thotë tek njëri-tjetri se është turp të flasësh me një gjuhë rrugaçërie, por janë po këta prototipa, të cilët pjesë të fjalorit të tyre kanë fjalët më të pahijshme.
Ndonëse të veshur me kostum e kollare, pak nga ata e meriton postin që kanë. Vulgariteti nuk ka të krahasuar, e ndërsa pushteti i mbron nga çdo shkelje flagrante. Ata ndjehen të pamposhtur, zotërojnë Kuvendin dhe jo vetëm, e ndërsa gjuha e përdorur nuk është “arma e tyre më e fortë”.
Në këtë drejtim ata të zhgënjejnë totalisht. Parlamenti, në të shumtën e rasteve të ngjan me një cirk, ku ata rrihen me njëri-tjetrin, i hedhin letra e miell kundërshtarit, shahen me “libër shtëpie”, dhe kur dalin jashtë, një kafe është gjëja më e paktë që mund të ndodhë.
Por kjo pak rëndësi ka, para asaj shfaqje të shëmtuar që të japin të zgjedhurit e popullit shqiptar, ata që janë elita, e duhet të na përfaqësojnë denjësisht. Deputetët kanë treguar spektakël jo vetëm me grushta, por dhe me armë. Kjo situatë e nderë s’ka nevojë për shumë komente, pasi realiteti shqiptar të ofron lloj-lloj maskash.
Tempulli i së drejtës është kthyer në një vend etiketimesh, të cilat aty s’kanë vend. Ti mësosh një deputeti edukatën, sigurisht që kjo është e çuditshme, por ata kanë shkatërruar me fjalorin e tyre një brez të tërë.
Nëse mendojnë se lavdia fitohet duke akuzuar, e duke i kujtuar nënën dhe motrën, atëherë këtu diçka çalon. Kurrsesi nuk mbahet pushteti duke lartësuar antivlerat. Ngritja e zërit nuk tregon burrëri. Është për të ardhur keq kur shikon deputetë që shajnë me “libër shtëpie”, shpifin, përbaltin familjarët e kolegëve të tyre, duke dëshmuar jo një model etike, por një model shthurjeje e primitivizmi. Shfaqja që na ofrohet të enjten në Kuvend, është rasti tipik i një stili rrugaçëror. E përkthyer ndryshe, një shfaqje e cila nuk vlen asnjë qindarkë për tu parë!
Nëse batutat “pa kripë” do modernizoheshin, atëherë ia vlen “barra qiranë” për ti parë e dëgjuar, ndonëse shpesh herë ngatërrohen me këmbët e tyre.
TIRANA TODAY
