E gjithë bota e boksit është në pritje të një dueli mes Joshua dhe Wilder. Boksieri anglez pasi mposhti Joseph Parker i bëri thirrje publike amerikanit: “Ok, le ta bëjmë atë”. Por duket se akoma nuk kanë filluar bisedimet për këtë meç që do të sillte unifikimin e titujve kampion bote në peshat e rënda.
U raportua nga shtypi britanik se promotori i Anthony Joshua, Eddie Hearn i kishte dërguar një ofertë prej 13 milionë dollarëve Deontay Wilder, mirëpo vet promotori personalisht e mohoi këtë lajm pastaj.
Flitet që kjo përballje të realizohet gjatë verës dhe fitimet që do marrin të dy boksierët do të arrijë në 100 milionë dollarë. Fillimisht ekipi i Wilder kishte kërkuar një ndarje 50/50, por pastaj kanë thënë se do të pajtoheshin edhe me 40%-shin e asaj shume.
Por Joshua gjatë një intervistë për “Sky Sport” ka hedhur poshtë zërat që flasin për një shumë të tillë dhe ka thënë me bindje se nëse është e vërtetë firmos që tani për një ndarje 50/50.
“Nëse bëhet fjalë për një meç që paguhet 100 milionë dollarë dhe ekipi i Wilder janë të lumtur që ata të marrin 40% të shumës, kurse pjesa ime të jetë 60%, atëherë unë po them se, ma jepni gjysmën e asaj shume, pra 50 milionë dollarë dhe betohem se nesër do ta pranoja meçin”, tha Joshua, raporton insporti.
“Por, ata (ekipi i Deontay Wilder) nuk janë duke bërë oferta të tilla të mëdha për këtë meç dhe vetëm janë duke folur kot, për këtë arsye nuk mund ta marr si serioze, pasi po them edhe njëherë, sikur të ishte ajo shumë e madhe, nesër do ta pranoja përballjen”, deklaroi Anthony Joshua.
“Në anën tjetër, ne i kemi ofruar një ofertë serioze dhe të mirë, por ata në vend të na përgjigjen në mënyrë profesionale, po e dërgojnë këtë çështje në rrjetet sociale duke përmendur shifra të paqena, vetëm sa për të bërë bujë. Unë mendoj se në aspektin historik të boksit, kjo luftë duhet të ndodh dhe nuk do të ishte në rregull për këtë kohë dhe titujt që mbajmë të dy, që të mos ndodhte”, përfundoi intervistën e tij Joshua.
