Jose Aldo i është shtuar listës së sportistëve që dëshirojnë të përballen në kafaz me Conor McGregor. Kampioni irlandez i arteve marciale mikse, e fitoi titullin në nëntor të vitit 2016 dhe asnjëherë nuk e ka mbrojtur atë, pasi në gusht të këtij viti debutoi në boks, ku u mund nga Floyd Mayweather. Braziliani Jose Aldo ka ngritur zërin që UFC të marrë një vendim për këtë situatë,ose ti heqë titullin kampion, irlandezit McGregor, pasi shumë sportistë ëndërrojnë ta fitojnë atë dhe po u mohohet mundësia.
“Janë të shumtë sportistët në atë peshë që duan të duelojnë për titullin kampion, ndërkohë që irlandezi po e mban peng atë gjerdan prej më shumë se një viti. Janë të shumtë djemtë që ëndërrojnë titullin, të gjithë presin për një shans, ndaj UFC nuk duhet të mbajë anën e McGregor, por ta rikthejë atë në kafaz. Ose Conor të heqë dorë nga titulli dhe të mendojë për paratë. Ka ardhur koha për McGregor ta mbrojë titullin dhe të mos fshihet më. Kjo është një situatë e shëmtuar dhe UFC po bëhet palë me irlandezin dhe jo me sportistët”, u shpreh braziliani Jose Aldo.
