Vaksina anti-covid e prodhuar nga AstraZeneca, ka dominuar titujt kryesorë të raporteve mjekësore lidhur me mpiksjet e gjakut, por, tani rregullatorët evropianë të sigurisë së barnave po hetojnë rreziqet e mundshme të mpiksjes nga vaksina Johnson & Johnson.
Rregullatori i barnave të Bashkimit Europian ka filluar të rishikojë dhe njëherë sigurinë e kësaj vaksine, për të vlerësuar më pas rastet e mpiksjes së gjakut te personat që u vaksinuan me këto doza, shkruan Fierce Pharma.
Ka qenë vetë Agjencia Europiane e Barnave ajo e cila bëri të ditur katër rastet e personave të cilët kishin pësuar trombozë.
Një nga rastet ndodhi gjatë studimit klinik dhe tre rastet e tjera ndodhën në Shtetet e Bashkuara të Amerikës.
Agjencia shtoi se po i hetonte këto raste dhe më pas do të vendoste nëse veprimi rregullator mund të jetë i nevojshëm, i cili zakonisht konsiston në një azhurnim të informacionit të produktit.
Deri më tani, vaksina është e disponueshme vetëm në SHBA, por zyrtarët evropianë së fundmi e autorizuan atë dhe shpërndarja pritet të fillojnë së shpejti.
