Pak ditë pas sulmit kibernetik në sistemin TIMS, që sipas autoriteteve shqiptare është financuar nga Irani, Ministri i Mbrojtjes, Niko Peleshi njoftoi se një projekt me vlerë 24 milionë dollarë është duke u vënë në zbatim.
Pas përfundimit të mbledhjes së qeverisë, ai bëri me dije se po punojnë për një projekt 24 milionë dollarë për të rritur mbrojtjen kibernetike. Gjithashtu deklaroi se nuk ka vend për panik, pasi vendi ynë, si vend anëtar në NATO është i pacënueshëm.
“Për herë të parë po e ndaj me publikun faktin që sistemet tona kibernetike ushtarake, as herën e parë as tani nuk janë prekur. Janë më se të mbrojtura për shkak se janë të dedikuara dhe të shkëputura nga sistemet e tjera. Sa i përket planeve dhe projekteve që po punojmë për ta ngritur në një nivel më të lartë sigurinë kibernetike, jemi në zbatim të një projekti shumë të madh në vlerë 24 mln dollarë të mbështetur nga partnerët që synon ngritjen e qendrës së sigurisë kibernetike dhe aftësimin e stafit. Nuk jemi në ndonjë skenar të mundshëm të cenimit të sovranitetit tonë. Jemi anëtarë të NATO-s, jemi të paprekshëm. Asnjë territor i NATO-s nuk është i cënueshëm”.
