I dërguari i lartë i Shteteve të Bashkuara për Korenë e Veriut, Sung Kim tha të hënën se ai pret një përgjigje pozitive për dialog nga vendi komunist.
“Ne vazhdojmë të shpresojmë se Koreja e Veriut do i përgjigjet pozitivisht shtrirjes sonë të dorës dhe ofertës për t’u takuar kudo dhe kurdo pa parakushte”, deklaroi Sung Kim në kryeqytetin e Koresë së Jugut, Seul, shkruan National Post.
Zyrtari mbërriti në Seul, një ditë pasi media shtetërore e Koresë së Veriut njoftoi se udhëheqësi Kim Jong kërkoi përgatitje për dialog dhe konfrontim me Shtetet e Bashkuara.
Sipas Kim Jong, Koreja Veriore duhet të përgatitet për përballje, “për të mbrojtur dinjitetin dhe interesat e shtetit, për zhvillim të pavarur”, si dhe për të garantuar një ambient paqësor për sigurinë e verikoreanëve
Negociatat midis Uashingtonit dhe Phenianit nuk kanë bërë asnjë përparim që nga takimi i dështuar i Vietnamit në vitin 2019 midis ish-presidentit Donald Trump dhe udhëheqësit të Koresë së Veriut, Kim Jong Un.
