Gjykata administrative ka rrëzuar vendimin e qeverisë që parashikonte që avokatët do të paguanin TVSH duke filluar nga zero. Si pasojë tatimet kanë sqaruar mënyrën se si do të veprohet tani e tutje.
Rrëzimi i vendimit të qeverisë erdhi pas padisë që dërgoi në Gjykatën e Lartë, Dhoma Kombëtare e Avokatisë kundër Këshillit të Ministrave, pasi ligji për TVSH-në në pikën 2 të nenit 11 për sa i përket profesionit avokat, në lidhje me vendosjen e kufirit minimal të regjistrimit për TVSH, caktonte se avokatët detyrohen të llogarisin, të deklarojnë dhe të paguajnë TVSH në vleftën 20% të çmimit të shërbimit të kryer, pavarësisht xhiros vjetore të realizuar.
“Avokati përfshihet në skemën e TVSH-së vetëm pasi të plotësojë kriterin e qarkullimit të përcaktuar me Vendimi të Këshillit të Ministrave”, sqarojnë tatimet. Sipas tyre, aktualisht ky kufi është 5 milionë lekë, por duke nisur nga 1 prilli i vitit tjetër, kufiri do të ulet në 2 milionë lekë.
“Ndërkohë të gjithë subjektet tatimpaguese që janë të regjistruar dhe ushtrojnë profesionin e avokatit, mund t’i drejtohen Drejtorive Rajonale ku ata janë të regjistruar, për të deklaruar në mënyrë individuale, zgjedhjen për të qenë pjesë ose jo e skemës së TVSH-së, në mënyrë që këta të fundit të ndryshojnë përgjegjësinë tatimore për subjektet tatimpagues që ushtrojnë profesionin e avokatit. Me paraqitjen e tyre pranë shërbimit të tatimpaguesve në DRT përkatëse, do të orientohen për procedurat e mëtejshme që do të ndjekin”, thuhet në njoftimin e tatimeve.
