Momenti që u krye transferimi i Angel Di Marias nga Real Madrid tek Manchester United, ishte ndoshta më befasuesi për të gjithë ndjekësit e futbollit. Pasi largimi i tij erdhi një muaj pasi u shpall lojtari më i mirë i finales së Champios League. Padyshim ai ishte momenti më i lumtur për tifozët e “djajve të kuq”, por që nuk zgjati shumë dhe historia shkoi ashtu si nuk pritej.
Pas kaq kohësh Di Maria është kthyer të flasë për ngjarjet që ndodhën gjatë kohës që ai qëndroi tek Manchester United. Ai pati një fillim të shkëlqyer në ‘Old Trafford’, por forma e tij mori një kthesë pasi taktikat e ndjekura nga Louis van Gaal e nxorën argjentinasin jashtë pozicionit të tij dhe nuk arriti të japë më të mirën.
Për më tepër, në dhomat e zhveshje, sulmuesi i krahut kishte zbuluar detaje shokuese. Në fakt dita e ditës Di Maria kishte mësuar nga burime brenda klubit se ai ishte transferuar në ‘Old Trafford’ vetëm sa për të shitur fanella dhe jo për çështje sportive apo për t’iu dhënë gëzim tifozëve.
Në moment që ka mësuar këto detaje, Di Maria i ka kërkuar agjentit të tij për të gjetur një ekip tjetër. Mesa duket kjo ka qenë arsyeja që Angel Di Maria u lagua në një mënyrë të tillë nga United, duke nënshkruar me PSG në mënyrë të fshehtë dhe pa e diskutuar me ekipin që e kishte në pronësi.
