Reagimet e mediave evropiane, për vizitën e presidentit amerikan, nuk përkojnë fare me ato që thotë “Shtëpia e Bardhe”
Zyrtarët evropianë thonë se aleatët e transatlantikut nuk janë tani më të bashkuar se sa kur ishin para fitores së Donald Trump.
Në kryeqytetet kryesore evropiane, Berlin dhe Paris, nuk u fol fare për një vizitë të suksesshme në kontinent.
Gazeta belgjiane “Le Soir” kishte si titull në faqe të parë: “Trump shtyn me forcë aleatët”.
Gazeta financiare gjermane Handelsblatt i vuri atij nofkën “kryeharbuti”.
Evropianët patën shpresuar që vizita e zotit Trump të shënonte një lloj rikuperimi të marrëdhënies transatlantike, të vështirësuar nga zgjedhja e tij; ata prisnin që presidenti amerikan t’i shikonte zhvillimet botërore edhe nga këndvështrimi i tyre.
Por që nga Brukseli, e deri në Siçili, analistët thonë se pati “buzëqeshje të ngrira” dhe “mendime të ndryshme” për një numër çështjesh, si tregtia, imigracioni, sanksionet ndaj Rusisë dhe ndryshimet klimatike.
Gazeta franceze “Le Monde” shkruante: “Gjatë vizitës së tij të parë jashtë vendit, Presidenti Trump ju përmbajt linjës së tij “Amerika first”- Amerika e Para, duke refuzuar të merrte hapa për përmirësimin e marrëdhënieve mes Shteteve të Bashkuara dhe Europës.”
Artikulli e gjykon të gabuar mungesën e një deklarate nga zoti Trump për të ritheksuar Artikullin e 5-të të NATO-s, që garanton ndihmë reciproke në rastin e një sulmi ndaj një vendi anëtar dhe për kërkesën e tij ndaj udhëheqësve evropianë për ndarjen e barrës së përbashkët financiare.
Gazeta gjermane “Der Spiegel” publikoi një fotografi të takimit të Presidentit Trump me presidentin e ri francez Emmanuel Macron, ku të dy burrat duken duke shtrënguar duart si në një ndeshje mundjeje, një metaforë vizuale e udhëtimit evropian të presidentit amerikan. Komenti për fotografinë, ishte se të dy burrat i treguan forcën njëri tjetrit.
Media të tjera evropiane i kushtuan vëmendje të veçantë momentit kur zoti Trump e shtyu kryeministrin malazez Dusko Markovic, për të dalë në rresht të parë, gjatë fotografimit me udhëheqësit e NATO-s.
Ndërsa, zëdhënësi i Shtëpisë së Bardhë Sean Spicer deklaroi përmes rrjetit social “Twitter” se udhëtimi i parë jashtë vendit i Presidentit Donald Trump ishte shumë i suksesshëm, ndërsa presidenti amerikan kishte marrë rrugën e kthimit pas “9 ditëve me shumë produktivitet”.
