Policia Kufitare ka sekuestruar 250 mijë euro izraelitit në aeroportin “Nënë Tereza”. Shuma e madhe e parave është gjetur gjatë kontrollit fizik që iu bë shtetasit izraelit E.R., 49 vjeç, lindur dhe banues ne Izrael.
Gjatë kontrollit në bashkëpunim me Doganën Rinas, shtetasit E. R., i cili udhëtonte nga Moska për në Shqipëri, iu gjetën një sasi valute në kartëmonedha euro të padeklaruara në degën e Doganës Rinas.
Shtetasi izraelit ka thënë se nuk e dinte që duhej t’i deklaronte paratë në doganën e Rinasit në hyrje. “Nuk e dija që duhet t’i deklaroja. Do bëja biznes me blerje pronash apo fusha të tjera. Më kanë thënë që këtu ka mundësi të mira për biznes prandaj kisha 250 mijë euro. Kam edhe para të tjera që dua t’i investoja këtu”, ka thënë izraeliti gjatë marrjes në pyetje nga policia.
Materialet do t’i kalojnë Prokurorisë se Rrethit Gjyqësor Tirane për veprime të mëtejshme, në ngarkim të shtetasit E.R, për veprën penale “Mos deklarimi në kufi i të hollave dhe sendeve me vlerë”.
