Pas rezolutës në OKB kundër njohjes së Jerusalemit si kryeqytet të Izraelit, ka ardhur edhe reagimi i këtij të fundit.
Është zëdhënësi i Ministrisë së Jashtme Emmanuel Nahshon, i cili tha se Izraeli do të largohet nga UNESCO deri në fund të vitit 2018. Sipas tij, ky vendim erdhi pasi u panë “përpjekjet e UNESCO-s për të shkëputur historinë hebraike nga toka e Izraelit”, duke shtuar se letra zyrtare do t’i paraqitet agjencisë së OKB-së nga fundi i këtij viti.
“Vendimi është marrë pasi UNESCO refuzon të lidhë historinë hebraike me historinë e Izraelit”, tha zëdhënësi.
Izraeli i ka këruar UNESCO-s që trashëgimia kulturore dhe historike brenda territorit izraelit të konsiderohet si “trashëgimi hebraike”, por UNESCO thekson se “historia nuk mund të ndryshohet. Pasi çdo trashëgimi kulturore i përket periudhës që ajo i përgjigjet, pasi ndryshe do të kemi falsifikim të historisë”
Asambleja e Përgjithshme e OKB-së votoi në 21 dhjetor në favor të një rezolute, jo detyruese, ku dënohet njohja e Jerusalemit si kryeqytet i Izraelit nga ana e Uashingtonit.
Në 193 vende anëtare, 128 votuan pro kësaj rezolute, 9 kundër, ndërsa 35 vende vendosën të abstenojnë.
Statusi i Izraelit shkon në zemër të konfliktit mes izraelitëve dhe palestinezëve. Kujtojmë se Izraeli pushtoi lindjen e qytetit, e cila kontrollohej nga Jordania, në vitin 1967 dhe e konsideron të gjithë qytetin si kryeqytetin e tij të pandashëm.
