Izraeli ka instaluar kamera të reja sigurie në hyrje të xhamisë së shenjtë të al Aksa në Jeruzalem, menjëherë pasi zyrtarët deklaruan se ishin të gatshëm të shqyrtonin të gjitha “alternativat” ndaj detektorëve metalikë në vendin e shenjtë që rritën tensionet në rajon përgjatë fundjavës.
Duke folur nga Jerusalemi Lindor i pushtuar, Imran Khan i Al Jazeera tha se palestinezët kishin frikë se Izraeli do të vendoste kamerat CCTV në hyrje të kompleksit al-Aksa:
“Palestinezët janë shumë të zemëruar për këtë, sepse e konsiderojnë këtë një masë shtesë të sigurisë. Ata gjithmonë kanë pohuar se detektorët metalikë mund të jenë lëvizja e parë e Izraelit për të marrë në kontroll kompleksin”.
Izraeli paraqiti masat e reja të sigurisë javën e kaluar pasi armëpushuesit palestinezë hapën zjarr nga vendi i shenjtë, duke vrarë dy policë izraelitë. Kamerat e sigurisë, sipas autoriteteve izraelite, janë një masë e nevojshme për të parandaluar sulme të tjera dhe se vendosja e tyre ishte një gjë rutinë, siç ka ndodhur me vendet e shenjta anembanë botës.
Megjithatë, palestinezët janë përgjigjur me protesta masive, pasi thanë se Izraeli po përpiqej të zgjeronte kontrollin e tij në vendin e administruar nga myslimanët.
Hussein Da’na, një 76-vjeçar palestinez, i tha Al Jazeera se ai refuzon dhe është kundër vendosjes së kamerave të sigurisë, pasi sipas tij ato dëmtojnë më tej palestinezët, raporton Ora News.
“Këto kamera janë vendosur për të identifikuar fytyrat e njerëzve të cilët janë të ndaluar të hyjnë në xhaminë el-Aksa”, tha Da’na.
“Ne lutemi çdo mëngjes këtu dhe policia na sulmon. Nuk kam ndërmend të vazhdoj të lutem më këtu derisa Izraeli të heqë gjithçka që është e re”, shtoi ai, duke iu referuar masave të sigurisë.
