Ministri izraelit i mbrojtjes Benny Gantz diskutoi zhurmën mbi akuzat rreth firmës izraelite të mbikëqyrjes kibernetike NSO Group, gjatë një vizite në Paris të mërkurën. Gantz u takua me homologen e tij franceze Florence Parly, si dhe kreun e DGSE Bernard Emie, dhe udhëheqës të komunitetit hebre francez, tha Ministria e Mbrojtjes e Izraelit në një deklaratë.
“Ministri Gantz trajtoi çështjen e NSO-së dhe tha se Izraeli po i merr seriozisht akuzat,” thuhej në deklaratë. “Ai vuri në dukje se Shteti i Izraelit miraton eksportin e produkteve të TI ekskluzivisht në njësitë qeveritare, për përdorim të ligjshëm dhe vetëm me qëllim të parandalimit dhe hetimit të krimit dhe antiterrorizmit.” Ministria tha se Gantz e informoi Parlyn se “zyrtarët vizituan zyrën e NSO sot dhe se Izraeli po heton akuzat në tërësi”. Gjatë vizitës, Gantz diskutoi gjithashtu marrëdhëniet strategjike të mbrojtjes midis Izraelit dhe Francës, krizën në Liban dhe zhvillimin e marrëveshjes me Iranin.
Spiunimi i mundshëm i celularëve të krerëve të shumtë të shteteve dhe gazetarëve me programin Pegasus të NSO -së kishte shkaktuar një tronditje ndërkombëtare. Ambasadori i Marokut në Paris mohoi raportet e mediave se një shërbim sigurie në vendin e tij kishte vënë në shënjestër udhëheqësin francez Emmanuel Macron për spiunazh të mundshëm duke përdorur Pegasus.
Macron kishte thirrur një takim urgjent të Këshillit të Sigurisë dhe Mbrojtjes Kombëtare për të diskutuar pasojat. Pegasus përdor vrima sigurie në softuerin e smartphone –ve, për të fituar qasje të gjerë në të dhëna. Një konsorcium ndërkombëtar i gazetarëve kishte raportuar kohët e fundit një grup të dhënash prej rreth 50,000 numrash që dyshohet se ishin zgjedhur nga klientët e NSO si objektiva të mundshëm spiunazhi. NSO mohoi akuzat dhe kundërshtoi detajet individuale të raporteve.
