Masa ekstreme pritet të merren nga qeveria shqiptare për të “paprekshmit” e botës së krimit. Izolim ekstrem parashikohet edhe për ata që tashmë janë pas hekuarave. Ndërsa nga ana tjetër për ata që ende po sfidojnë ligjin, do të ketë një nismë të posaçme. Goditja e të fortëve që u kanë shpallur luftë autoriteteve, do bëhet në bazë të hartimit të ndryshime në Kodin Penal. Një informacion të tillë kreu i qeverisë e ka bërë të ditur pas mbledhjes së qeverisë. Sipas kryeministri Edi Rama, të dënuarve të rrezikshëm do t’u ndërpritet çdo komunikim. Si dhe priten ndryshime në Kodin Penal për goditjen e të fortëve që veprojnë jashtë qelive.
Nisma e parë
Në nismë e parë parashikohen ndryshime ligjore. Këto ndryshime, kanë të bëjnë me izolim dhe monitorim shumë të rreptë të personave të dënuar. Por, edhe për ata të cilët janë të dyshuar si të përfshirë në krim të organizuar.
Kjo nisma ligjore do të bazohet në modelin italian, e njohur me emrin “41-bis”. Të dënuarit apo të dyshuarit për krim të organizuar apo terrorizëm nuk do të kenë më asnjë kontakt me njerëz të brendshëm apo të jashtëm.
“Kemi vendosur të ndërmarrim një ndryshim ligjor për të dyshuarit, apo për të dënuarit për përfshirje në krim të organizuar, apo dhe organizata terroriste, të cilët do t’i nënshtrohen një regjimi të ri, shumë të rreptë, izolimi dhe monitorimi, duke iu ndërprerë çdo lloj komunikimi të brendshëm dhe të jashtëm për të gjithë kohën e paraburgimit dhe të vuajtjes së dënimit. Është një model që mund ta shihni në detaje, duke iu referuar atij aspekti të legjislacionit peniteciar, që italianët e pagëzojnë me emrin “41-bis”, që do të thotë se këta lloj përfaqësuesish të botës së krimit do të kenë kontakte shumë të kufizuara me qeniet e tjera njerëzore dhe shumë rreptësishtë të monitoruara për të gjithë kohën e vuajtjes së dënimit të tyre”, tha Rama.
Nisma e dytë
Por, nga ana tjetër qeveria po punon për hartimin e një tjetër pakete masash kundër të fortëve. Dje kryeministri ka paralajmëruar se qeveria ka nisur hartimin e disa ndryshimeve në Kodin Penal. Kjo sipas tij, do të çojë në rritjen e ndëshkimit ndaj personave që sfidojnë ligjin. Në këtë pakëtë parashikohet ashpërim i dënimit për veprën penale të gjobëvënies.
“E fundit, qeveria ka nisur draftimin e një pakete ndryshimesh në Kodin Penal për të fortët. Kështu quhet paketa, “Të fortët”, të cilëve, përmes një trajtimi ekzemplar, përmes përshkallëzimit të presionit të Policisë së Shtetit në çdo territor, do t’u rezervojmë dhe ndëshkime penale ekzemplare për format e tyre të preferuara të karshillëkut ndaj ligjit, ndaj qytetarëve dhe ndaj biznesit. Së shpejti, natyrisht, duke qenë se bëhet fjalë për ndryshime në Kodin Penal, këtë paketë do ta ndajmë me opozitën, duke shpresuar në mundësinë e kthimit të saj nga bota e filmave në terrenin e përpalljes reale me kriminalitetin. Këto ishin vendimet dhe masat e marra sot nga qeveria”, tha Rama.
