Lushnja mund të mos jetë ekipi i duhur për të treguar forcën Partizani, por është momenti ideal për të kuqtë që të marrin fitoren e parë në këtë sezon. Iuliano shprehet i qetë se në ekip është cdo gjë në rregull dhe se ka mbështetjen e të gjithë ekipit. Ky do të jetë momenti i kthesës dhe tani e tutje Partizani do të shfaqë në fushë të gjitha kualitetet që ka.
“Është normalë qe jemi në një moment delikat. Kjo ndeshje ndaj Lushnjes vjen në një moment kur duam fitoren dhe tre pikët e para.
Po punojmë për të perfeksionuar jo vetëm anën psikologjike por edhe atë fizike të disa lojtarëve. Do të bëjmë gjithçka mirë për të arritur rezultatet pozitive për skuadrën dhe tifozët.”
“Edhe pse është krijuar ideja se Lushnja nuk është një kundërshtar i fort, momentalisht nuk mund të shohin nivelin e të tjerëve. E respektojmë kundërshtarin. Lojtarët duhet ti tregojnë drejtuesve, stafit dhe tifozëve, që nuk kemi gabuar me zgjedhjet e bëra. Pres përgjigjen më të mirë.”
Dëmtimi i Çanit mbetet një temë e diskutuar te Partizanit, me trajnerin që pret rikthimin e sulmuesit në formë optimale. Përballë Lushnjes një risi pritet të jetë aktivizimi i Prognit si mbrojtës i djathtë, ndërsa Bardhi dhe Xhixhua janë në balotazh për një vend në formacion.
“Çani ka një program rikuperimi me përgatitësit fizik. Të gjithë e presim rikthimin e tij. Çdo gjë po ndiqet me kujdes nga stafi mjekësore. Kur të jetë në 100% të formës do të rikthehet. Presim edhe rikthimin e Fejzullahit, që është një lojtar mjaft cilësor. Sinjale pozitive kam marrë nga Progni, që në kupë u aktivizua si mbrojtës i djathtë dhe mund të luajë në çdo rol. Sinjale pozitive kam marrë edhe nga Xhixhua dhe nga Bardhi, që po punojnë mjaft mirë.
Trajneri është i bindur se skuadra është e bashkuar, ndërsa konfirmoi se ka mbështetjen e të gjithëve, duke nisur nga ish-kapiteni Alban Hoxha. Gjithçka duket një garanci për të vazhduar punën drejt objektivave sezonalë.
“Besoj se në skuadër nuk ka klane dhe lojtarët kanë folur me njeri tjetrin për të saktësuar se nuk ekziston asnjë problem dhe se të gjitha janë të angazhuar të dalin nga kjo situatë. Në fillim të javës bisedova për 20 minuta me Alban Hoxhën dhe në fund u përqafuam, pasi ai është një lider dhe lojtari më i rëndësishëm i skuadrës. Albani më tha se është momenti që të jemi më të bashkuar dhe të punojmë fort që të rikthehemi tek rezultatet pozitive. Nuk ndihem i rrezikuar, edhe sepse lojtarët kanë shprehur vullnetin se duan të vazhdojnë të punojnë me mua. Ma konfirmojnë çdo ditë në stërvitje një fakt të tillë.”
