Prokuroria e Krimve të Rënda ka marrë në pyetje Fredi Belerin, të cilit iu ndalua kandidimi nga KQZ për Bashkinë e Himarës, pasi akuzohet për përfshirje në akte terroriste.
Ishte pikërisht hetimi për rihapjen e Masakrës së Peshkëpisë, ngjarje e ndodhur në vitin 1994, e cila nxori në skenë emrin e Belerit.
Mes personave të akuzuar si pjesëmarrës në këtë masakër është edhe emri i Fredi Belerit, në atë kohë 23 vjeç. Me rihapjen e dosjes, Beleri është thirrur për t’u pyetur për sulmin terrorist të 25 viteve më parë, ku ranë dëshmorë ushtarakët Fatmir Shehu e Arsen Gjini dhe u plagosën tre ushtarë të tjerë.
Emrat që përfshihen në këtë masakër mohojnë përfshirjen e tyre në këtë ngjarje, ndërsa Bejleri thotë se akuzat ndaj tij janë sulme për shkak të aktivitetit politik.
“Erdha që të mbaroj baltosjen e figurës time për një çështje që nuk kam asnjë lidhje. Në ditën dhe muajin që është bërë veprimi kam qenë në Qipro dhe autoritetet greke dhe shqiptare i kanë provat për të mos hedhur më baltë mbi emrin tim”, deklaroi për Top Channel Beleri.
