Zbardhet dëshmia e shoferit Armando Pezaku dhe menaxherit Donald Lushaj, të cilët u arrestuan pas kapjes së sasisë rekord të kokainës, zbuluar në portin e Durrësit, vlera e të cilës shkonte 180 milion euro.
Shoferi Pezaku, i cili në profilin e tij në Facebook përshkruante punën që bënte me fjalët “Iu çoj partizanëve miell”, ka thënë se është lajmëruar vetëm për të marrë ngarkesën në port.
“Më njoftuan se ngarkesa erdhi, shkova në port. Vetëm mora kamionin me ngarkesën”, është shprehur 25-vjeçari.
Edhe menaxheri Lushaj ka mohuar të kishte dije për drogën që gjendej në kontejnerët e kamionit, ndërsa ka thënë para policëve se ishte punësuar për t’u marrë me aktivitetin e kompanisë, me organizimin e punës e zgjedhjen e kompanisë së transportit, ndërsa s’ka pasur dijeni për kokainën brenda në kamion.
