Italia bën një vit që nuk fiton. Azzurrët vazhdojnë ecurinë negative edhe nën drejtimin e Mancinit, pasi janë ndalur në një barazim 1-1 ndaj Ukrainës. Statistikat i jepnin avantazh Italisë ndaj Ukrainës, me Azzurri-t që nuk kishin humbur asnjëherë në shtatë ndeshjet e luajtura, duke fituar gjashtë dhe duke barazuar një.
Ndeshja ishte shumë e veçantë pasi luhej në Marassi për të krijuar fonde për familjet e prekura nga shkatërrimi i urës Morandi më 14 gusht. Në minutën e 43’ ndeshja u ndal në nder të 43 personave që humbën jetën gjatë tragjedisë.
Italia e nisi mirë ndeshjen dhe ishte skuadra e Mancini-t ajo që diktoi ritmin e lojës ndaj ukrainasve. Me kalimin e minutave Azzurri filloi të rrezikonte portën kundërshtare dhe mundësia më e mirë erdhi në minutën e 22’ me anë të Lorenzo Insigne goditja e të cilit shkon shumë pranë portës. Italia mundohet të bëjë më tepër por tentativat e tyre gjatë shumicës së kohës ishin nga distanca në pamundësi për të depërtuar në zonën ukrainasve.
Pas pushimit ishte Bernardeschi ai që gjeti golin e avantazhit pikërisht nga një goditje nga distanca. Sulmuesi i Juventus lëshoi një predhë të vërtetë me topin që “çan” duart e portierit ukrainas dhe përfundon në rrjetë. Por Ukraina kundërpërgjigjet menjëherë me golin e Malinovski-t. Një gol shumë i bukur i miqve i ka dhënë barazimin skuadrës së Shevchenko-s. Në minutat e mbetura skuadrat dukeshin të lodhura dhe nuk e kërkuan golin e fitores. Italia vazhdoi të insistonte pak më shumë por pa rrezikuar seriozisht portën ukrainase.
