Nga: Barbie Latza Nadeau & Valentina Di Donato “CNN”
Italia po hyn në javën e katërt të krizës më të rëndë kombëtare, që nga Lufta e Dytë Botërore. Më shumë se 60 milion njerëz, po jetojnë nën një karantinë gjigante gjithnjë e më të padurueshme. Dyqanet që mbeten të hapura po mbyllen tashmë më herët, dhe policia po patrullon në një numër gjithnjë e më të madh, duke gjobitur familjet që kanë dalë të shëtisin, dhe duke siguruar që askush të mos jetë rrugëve pa një arsye të vlefshme.
Pavarësisht masave të forta kufizuese, numri i rasteve të reja në vend po rritet me një normë prej rreth 3.500 ose më shumë çdo ditë, ndërsa numri i të vdekurve po arrin në 3 mijë.
Përqendrimi më i madh i rasteve është në veri të vendit, ku të vdekurit po grumbullohen për t’u varrosur, pasi shërbimet funerale normale janë rreptësisht të ndaluara.
Pacientë me koronavirus, janë aq shumë sa rreshtohen korridoreve të spitaleve publike. Mjekët dhe infermierët janë duke u infektuar, për shkak të mungesës së një mbrojtjeje të duhur.
Shumë njerëz pyesin se si dhe kur do të marrë fund ky makth, dhe nëse ia vlen vërtetë kostoja e madhe ekonomike e bllokimit të thuajse gjithçkaje.
Ka në fakt disa shenja inkurajuese, se numri i rasteve të reja në vatrën e infeksionit në veri të Italisë mund të jetë duke rënë. Por ekspertët thonë se është ende shumë shpejt, që kjo të konsiderohet si një prirje e besueshme. Në gjithë Italinë, ka më shumë 2.000 njerëz të shtruar në repartet e kujdesit intensiv.
Shumica janë përqendruar në Lombardi, ku shpërtheu epidemia më 23 shkurt. Por shumë ekspertë frikësohen se do të ketë vatra të reja më tej në jug, ku infrastruktura shëndetësore është më e dobët, dhe ku ka më pak njerëz që po respektojnë masat e rrepta të karantinës.
Policia ka gjobitur deri tani më shumë se 200.000 njerëz në të gjithë vendin, dhe ka premtuar të gjobisë shumë më tepër duke nisur që nga fundjava që vjen, nëse njerëzit vazhdojnë që të shkelin kufizimet.
Dr. Xhorxho Palu, ish-presidenti i Shoqatës Evropiane dhe Italiane të Virologjisë, dhe profesor i virologjisë dhe mikrobiologjisë në Universitetin e Padovës, thotë për CNN se shpresoi të shihte shenjat e para të një ndryshimi, pas pak më shumë se një jave bllokimi mbarëkombëtar, por kjo gjë nuk po ndodh ende.
Palu tha se gjykuar nga numri i rasteve të reja, pjerrësia e kurbës është ende në rritje, duke e bërë gati të pamundur parashikimin, se kur bllokimi do të nisë të japë përfitime të dukshme. Por nga ana tjetër, ai beson se nuk ka asnjë alternativë tjetër ndaj karantinës, për aq kohë sa të gjithë bashkëpunojnë me të, dhe se të drejtat e qytetarëve nuk mund të tejkalojnë sigurinë e shëndetit publik.
Eksperti italian, beson se kufizimet duhet të ishin të më të gjera dhe më të rrepta që kohë më parë, në vend se të fokusoheshin fillimisht vetëm tek 11 bashkësitë e vendosura në zonën e kuqe.
“Ne duhet të kishim bërë më shumë teste diagnostikuese në Lombardi, ku kishte një vatër të madhe. Nuk ka kuptim të shkosh në supermarket një herë në javë. Duhet të kufizosh kohën tënde, izolimi është gjëja kryesore”, thekson ai.
Ai thotë se qeveria italiane ishte në fillim e mefshtë. “Pati në fillim një propozim për të izoluar njerëzit ,që vinin nga epiqendra e virusit në Kina. Pastaj u konsiderua si raciste, por në fakt ata ishin njerëz që vinin nga vatra e epidemisë. Dhe kjo gjë na çoi drejt katastrofës aktuale”, shton ajo.
Ndërkohë dr. Alesandro Grimaldi, drejtor i sëmundjes infektive në Spitalin Salvatore në L’Aquila, thotë se pa pasur më shumë burime në dispozicion, mjekët do ta kenë të vështirë të vazhdojnë të luftojnë më tej virusin.
“Ne mjekët, jemi ushtarë që luftojmë për vendin tonë. Nëse ne mund t’i japim fund epidemisë këtu në Itali, mund të ndalim epideminë në Evropë dhe botë”- thotë ai.
Alesandro Vergalo, specialist i anestezisë dhe kujdes intensiv, tha se Bashkimi Evropian e vonoi reagimin e tij për të kursyer ekonominë. “Unë mendoj se institucione të ndryshme të BE-së, kishin frikë se dëmi i ekonomisë evropiane, do të ishte më i madh se ai i shkaktuar nga koronavirusi. Tani të gjithë jemi duke paguar kostot, jo vetëm në Itali, por edhe vendet e tjera evropiane. Një kosto të madhe njerëzore dhe ekonomike”, thotë ai.
Karantina ka dhënë efekte kapilarenë gjithë strukturën e shoqërisë italiane. Njerëzit janë në ankth dhe ekonomia është në krizë. Pashka, që tradicionalisht nis sezonin turistik në të gjithë vendin, është anuluar, duke i kushtuar rëndë bizneseve të vogla dhe të mesme.
Shumë prej tyre, kanë thënë tashmë se nuk do të happen më kurrë. Ndërsa njerëzit nuk kanë mundësi të shlyejnë kreditë, personale apo të biznesit, bankat do të kenë nevojë për ndihmë, dhe efekti domino i kësaj krize historike do të zgjasë shumë.
TIRANA TODAY
