Edi Rama i qëndron besnik qëndrimit të tij të bërë publik për ditë me radhë, sa i takon ardhjes së refugjatëve në Shqipëri. Sikundër e bëri publike dhe një ditë më parë, edhe sot ai i mëshon faktit se tentativat nga ana e opozitës për të dezinformuar publikun, janë tentativa të kota dhe keqdashëse.
Hedhja e hipotezës nëse do vijnë ose jo, ka shkaktuar një revoltë të hapur nga ana e PD-së e LSI-së, të cilët i fryjnë edhe më shumë zjarrit. Ndodhur në këto kushte, Rama ka qartësuar sërish qytetarët, duke thënë se Samiti i BE-së për krizën e refugjatëve, hodhi poshtë lajmin e rremë për kampin në Shqipëri.
“Dje Samiti i BE për krizën e refugjatëve, shpoi tullumbacen gjigande të lajmit të rremë për kampin në Shqipëri!Ky lajm i prodhuar dhe propaganduar nga esadistët e rinj të Shqipërisë në politikë e media, s’ka asnjë lidhje me planet e BE për refugjatët. Mos t’ua harrojmë këtë turp”, shkruan ai në Twitter.
Prej ditësh, opozita ka nisur një debat të ashpër ndaj kryeministrit Rama, se po përgatit një plan sekret për të tërhequr ish luftëtarët rob të ISIS-it, në një kamp të financuar nga vendet perëndimore në Shqipëri.
Kjo kërkesë e ka zanafillën pas një vizite të kryeministrit bullgar Borisov, dhe konferencës së shtypit që ai mbajti përkrah Edi Ramës në Tiranë. Ai pretendoi se Shqipëria do priste luftëtarët e kapur rob nga ISIS.
“Në Shqipëri të hapet një qendër koordinimi për luftëtarët që kthehehen nga ISIS”, tha ai.
Kaq u desh që të shpërthenin polemikat dhe akuzat.
TIRANA TODAY
