Dy mësuesit, Donald Dervishi dhe Borsion Spaho mund të cilësohen si heronj, pas përpjekjeve të vazhdueshme për rindërtimin e një shkolle në Skrapar. Por ndërsa ishin në përfundim të rregullimit të shkollës, ata sot janë penguar nga Inspektoriati Shtetëror Shëndetësor Berat, me pretendimin se në një pjesë të shkollës po zhvillohet mësim, e në pjesën tjetër po rikonstruktohet.
Ata duan të dinë se çfarë pune ka ISHSH-ja në këtë drejtim, ndërsa theksojnë përmes një postimi në Facebook se punimet në pjesën e jashtme të shkollës, nuk kanë penguar vazhdimin e procesit mësimor.
Dy mësues në fshatin Vëndreshë Mal në Skrapar i kaluan pushime e verës duke u ndërtuar nxënësve të tyre një shkollë të re. Prej vitesh mësimi në fshat mbahej në një shtëpi me qira, por mungesa e izolimit nga kushtet atmosferike, ekspozonte shpesh nxënësit ndaj shiut dhe dëborës.
Pasi kontribuan një pjesë të parave të tyre dhe ia dolën të bëjnë bashkë shumë dhurues të tjerë përmes një fushate në internet, mësuesit Donald Dervishi dhe Borsion Spaho grumbulluan lekët e nevojshme.
