Adelina Sejdini, ish-viktimë e trafikimit po kalon një moment të vështirë në jetën e saj, pasi po lufton me një sëmundje tumorale.
Prej 20 vitesh ajo tashmë banon në krahinën e Brindisit, ndërsa bën thirrje për t’u pajisur me dokumente italiane.
“Koha që më ka mbetur për të jetuar, do doja ta jetoj si një qytetare e denjë. Para se të vdes, dua nënshtetësinë italiane.
“Unë kërkoj një minimum e të drejtave sepse prej shumë vitesh kam luftuar për të ndihmuar të gjitha viktimat e trafikimit, kërkoj të më jepet nënshtetësia italiane”, tha 44-vjeçarja shqiptare.
Adelina 19 vjet më parë, pasi ishte rrëmbyer, përdhunuar dhe shitur, mbërriti në Itali dhe u shfrytëzua për vite të tëra si viktimë e prostitucionit, deri në momentin kur bashkëpunoi me policinë dhe çoi në pranga dhjetëra persona të implikuar në trafikimin e femrave.
Sakaq, ajo iu nënshtrua një operacioni javën e kaluar në spitalin San Matteo në Pavia, dhe po qëndron ende e shtruar në spital.
“Unë kam nevojë për kujdes të vazhdueshëm shëndetësor. Shteti italian, shumë vite më parë, më bindi të denoncoj tutorët, më premtuan mbrojtje, tani të më mbrojnë deri në fund”, tha 44 vjeçarja.
Pas miratimit të dekretit të sigurisë së jetës së saj, ishte lëshuar vetëm një leje qëndrimi për raste të veçanta, e cila i skadon në Tetor.
“Këtu mjekët dhe infermieret kujdesen për mua, por kam frikë se mund të më dëbojnë për shkak se më skadon leja e qëndrimit”, shtoi ajo.
