Edhe ish-Presidenti Bamir Topi, është përfshirë në debatin e mosdekretimit të Ministrit të Jashtëm, Gent Cakaj. Në një lidhje me studion e “Open”, Topi komentoi “përplasjen” Rama-Meta.
Sipas tij, politika në vendin tonë është kthyer në një lojë jo serioze, dhe se kjo e ka zanafillën që në vitin 2008. Për Topin, ngërçi nuk qëndron tek Cakaj, por tek politika.
“Politika nuk është lojë, sepse ajo përcakton fatet serioze të një vendi. Ne jemi në Shqipëri dhe nuk do të doja të dëgjoja sonte një debat që merr konotacion të keq. Politika shqiptare është bërë lojë jo serioze, dhe kjo gjë e ka origjinën që në vitin 2008.
Është krijuar mendimi sikur Republika e Shqipërisë ka vetëm institucionin e kryeministrit. Çdo person që është bërë kryeministër, i konsideron të tjerët hiç. Problemi nuk është te Cakaj, por te politika”, deklaroi Topi.
Kur u pyet se si do të vepronte po të ishte në vend të Ilir Metës, ish-Presidenti tha pa mëdyshje se do të kishte preferuar një ministër nga Shqipëria.
“Po të isha në vend të Ilir Metës, pavarësisht nga respekti që kam për shqiptarët në të gjitha trevat, do të kisha preferuar një ministër të Jashtëm nga territori i Shqipërisë”.
