E ardhmja e Gianluiggi Buffon duket se do të jetë larg Juventusit dhe destinacioni më i mundshëm është drejt Argjentinës. Flitet se Boca Juniors i ka kërkuar Tevesit që si ish-shok skuadre ta bindë 40-vjeçarin italian të transferohet atje.
Por lidhur me këtë hipotezë ka reaguar ish-portieri i skuadrës argjentinase, Orlando Gati. 74-vjeçari deklaroi se afrimi i Buffon në skuadër do të ishte një çmenduri pasi duhen gjetur portierë të rinj. Gati shtoi se nëse do të kishte këmbët e forta, atëherë ai do të ishte një portier më i mirë se Buffon-i.
“Nuk e di pse duhet të vijë një portier i vjetër në skuadër. Nëse do të kisha mirë këmbët e mia, ju siguroj se do të isha një portier më i mirë se Bufoni. Edhe në këtë gjendje që jam tani, them se ai është më i dobët se unë. A nuk ka ndonjë portier 25-vjeçar të cilin mund ta merrni në skuadër?”, u shpreh ish-portieri Gati.
