Vitet e fundit, Halloween-i po festohet në Shqipëri, ndërsa në botë kjo festë kthehet në garë midis VIP-ave për kostumin më të bukur. Halloween-i u përhap në Shqipëri pas viteve ’90, duke ardhur e u bërë më shumë konkrete, kryesisht e festuar nga të rinjtë. Ish-myftiu i Tiranës, Ylli Gurra, në një intervistë për “Goodmorning Albanians” në “Euronews Albania”, është shprehur se është e tepruar që fëmijët të pikturohen si djaj në festën e Halloween-it. Ai tha se nuk ka asnjë problem që një fëmijë të pikturohet si engjëll, pasi kjo është tipike e fëmijëve, por nuk kanë përse të dalin nga natyra.
“Të vishet një kostum dhe t’i jepet një fytyrë engjëllore duke ju përshtatur botës kryesisht të fëmijëve sigurisht që është gjëja më pozitive, por nëse do më pyesje personalisht është shumë i tepruar ky djallëzimi sidomos i botës fëmijënore. Ata janë të gjithë engjëj”, u shpreh ish-myftiu.
Shenja dalluese e Halloween-it është kungulli, e cila e ka prejardhjen në SHBA. Halloween-i është dita e rikthimit të shpirtrave të vdekur, shtrigave me fshesë, maceve të zeza, errësirës dhe çdo gjëje të frikshme. Kunguj të mëdhenj të ndriçuar nga brenda, skeletë, figura hije, kostume të shumëllojta të çuditshme.
Emri i Halloween-it është interpretimi modern i All Hollows’ Eve të Irlandës, apo Dita e të gjithë Shenjtorëve. Kjo festë tepër e lashtë mbërriti në SHBA së bashku me emigrantët irlandezë dhe hodhi rrënjë për të vuajtur tani një transformim radikal.
Dita e 31 tetorit kur dhe festohet Halloween-i, shënon fundin e Vitit të Keltëve dhe besohet të jetë dita kur shpirtrat e atyre që kanë vdekur vitin e mëparshëm do të kthehen për të zënë vend në trupin e një të gjalli. Pikërisht për këtë arsye, njerëzit veshin kostume të frikshme për t’i trembur. Ekzistojnë versione të ndryshme të traditave të Halloween-it, por origjinën e vërtetë e gjejmë në festivalin antik të keltëve të njohur si Samhain. Në Skocinë e vjetër mendohej se ishte pikërisht nata e 31 tetorit, kur nuk kishte më kufi mes botës së të gjallëve dhe të vdekurve.
