Ish-ministri i Brendshëm, Fatmir Xhafaj ka shpjeguar dy nivelet e krimit të organizuar që ekzistojnë sot në vend.
I ftuar mbrëmjen e djeshme në emisionin ‘Java’, ish-ministri u shpreh se më të rrezikshmit janë atë që konsiderohen të sofistikuar, pasi sipas tij nuk dallohen nga qytetarët e zakonshëm. Për këtë nivel, Xhafaj tha se shpesh herë nuk mbajnë armë më vete, ndërsa shtoi se detyrohesh t’i shohësh në vende ku dhe duhet t’i përshëndetësh.
“Sot ka dy nivele të krimit të organizuar. Një nivel shumë të sofistikuar ku nuk e dallon nga unë dhe ti kur shkojmë pimë kafe apo në jetën e përditshme sepse një pjesë e tyre janë forcuar aq shumë sa janë bërë që të duken si qytetarë të zakonshëm. Nuk mbajnë pistoletë me vete dhe janë shumë të sofistikuar. Këta janë grupet kriminale më të rrezikshëm, shpesh herë detyrohesh t’i shohësh në vende ku dhe duhet ti përshëndetësh”, tha Xhafaj.
Nga ana tjetër, ish-ministri flet dhe për nivelin e dytë të krimit të organizuar, ku përfshihen personat me armë në brez dhe makina të blinduara, për të cilët tha se janë të përkohshëm.
“Grupi i dytë janë ata me pistoletë në brez e me makina të blinduara. Këtë janë të përkohshëm dhe nuk para jetojnë gjatë. Në idetifikimin e tyre duhet një punë e kujdesshme”, deklaroi Xhafaj.
