Ish-ministri i Kulturës në qeverinë Berisha, Bujar Leskaj, i ka dhënë një leksion ish-shefit të tij politik teksa nuk ka pranuar direktivat e tij, dhënë në kushtet kur drejton Kontrollin e Lartë të Shtetit.
Teksa raportonte në parlament për punën 1-vjeçare të KLSH-së, Leskaj është përballur me kërkesën e Berishës për ta quajtur Ramën dhe qeverinë si “hajdutë”, por Leskaj ka rezervuar tjetër përgjigje:
“I dashur Doktor, besoj se KLSH dhe unë e kemi bërë punën time audituese. Nuk mund të kalojmë ato vija që ligji nuk na i lejon. Ne audituesit nuk bëjmë politika, ne auditojmë zbatimin e politikave. Nëse unë si kryetar i KLSH në punën time në këto vite do të kaloja në këtë fushë riskoja pavarësinë e institucionit. Mund të kisha fituar disa kredite vetë por nuk ishte mirë për institucionin”, ka deklaruar ish-ministri i PD-së, Bujar Leskaj.
Debati:
Berisha: Ke deklaruar me dokumente të firmosura dhe vulosura nga kjo shumicë se këta çdo epitet mund tu vesh këtyre me në krye kryehajdutin, o të poshtëruar hajdutë që keni vjedhur 1,2 miliardë euro, e kuptoj, por një gjë është, po shkove te Mithat Frashëri shkon te e vërteta dhe ajo do të detyronte ty tu drejtohesh vetëm në këtë mënyrë atyre që u kanë grabitur shqiptarëve 1.2 miliardë euro në tendera, koncesione dhe nuk është e dhënë e imja, por institucionit qendror i llogarive të shtetit, kanë sjellë ligj për Olsin dhe Geronin, që lojërat e fatit të ulet tre herë tatimi për to se ata duhet të 3-4 fishojnë.
Nga vendi ka ndërhyrë ministri Pandeli Majko, por Berisha nuk ia ka kursyer as atij një batutë.
“Më mirë mos fol Pandeli se ty edhe të përzënë dhe të kthejnë pastaj”,- iu drejtua Berisha.
E teksa nisi të vazhdonte sërish fjalën drejtuar Leskajt, ka ndërhyrë nënkryetarja e Kuvendit, Vasilika Hysi, duke i kujtuar se duhet të bëjë pyetje pasi nuk është koha e diskutimit.
Leskaj:Po ta kisha kaluar në politike do të kisha fituar disa kreditë, por do të kisha rrezikuar institucionin. Parësore janë interesat e ekonomisë kombëtare të ruajmë pronën shtetërore mes auditimeve që bëjmë, por jo të kalojmë në politikë.
