Ish-ministri francez, Patrick Devedjiani ka humbur jetën ditën e sotme, pasi ishte prekur nga koronavirusi.
Ish-ministri 75-vjeçar ishte diagnostikuar me COVID-19 disa ditë më parë, por nuk ia ka dalë dot të mposhtë virusin vdekjeprurës.
Devedjiani bëhet kështu zyrtari i parë francez që humb jetën nga koronavirusi. 75-vjecari ka shërbyer gjithashtu si president i rrethit administrativ të Parisit.
Ai ka qenë këshilltar i ngushtë i ish-presidentit francez, Nicolas Sarkozy.
Patrick Devedjian ishte ministri përgjegjës për trajtimin e rimëkëmbjes franceze nga kriza financiare e vitit 2008. 75-vjeçari njoftoi publikisht të mërkurën se po vuante nga simptomat e koronavirusit.
“Unë jam i prekur nga epidemia, prandaj jam në gjendje të dëshmoj drejtpërdrejt për punën e jashtëzakonshme të mjekëve dhe infermierëve. Unë po u dërgoj atyre një falënderim të madh për ndihmën e tyre të vazhdueshme për të gjithë pacientët e tyre”, shkroi ai më herët gjatë javës, në një postim në Twitter.
