Ish-menaxheri i Michael Schumacher, ka akuzuar bashkëshorten e sportistit se po fsheh të vërtetën në lidhje me gjendjen e tij.
Dyshimet e Willi Weber janë rritur edhe më shumë, pasi bashkëshortja e kampionit të ‘Formula 1’ e ka ndaluar ta vizitojë atë.
Sipas tij, Corinna Schumacher nuk e lë atë të ketë vizita pasi ka frikë se mos e vërteta rreth gjendjes së tij del në pah. 77-vjeçari ka shtuar se është i dëshpëruar dhe mezi pret ta shohë edhe njëherë kampionin.
“Unë e di që Michael ka pësuar një goditje të rëndë, por fatkeqësisht nuk e di se çfarë progresi ai ka bërë që nga ajo kohë. Do doja të dija se si ai është dhe t’i shtrëngoja dorën. Por fatkeqësisht, kjo gjë më është ndaluar nga Corinna. Ajo ndoshta është e frikësuar se unë do e shoh si është gjendja e tij dhe do ta bëj publike për audiencën.
Unë besoj në shërimin e Michael sepse e di që ai është një luftëtar. Nëse aty gjendet një shans, ai do e marrë atë. Ky nuk mund të jetë fundi. Unë lutem për të dhe jam i bindur se do e shohim përsëri”, tha ai për një dokumentar gjerman.
7 herë kampioni i botës pësoi një dëmtim gati fatal në vitin 2013 dhe që prej asaj dite nuk dihet asgjë në lidhje me gjendjen e tij shëndetësore. Që atëherë Schumacher është kujdesur në shtëpinë e tij në Liqenin e Gjenevës, nga gruaja e tij dhe dy fëmijët e tyre Gina-Marie, 22 vjeç dhe Mick, 20 vjeç.
