Vrasja e gjeneralit iranian mund të shpjerë në një konflikt botëror. Kjo ngjarje mund të jetë vetëm fillimi i një spiraleje dhunë dhe eliminimesh në gjithë botën kanë paralajmëruar analistë të shumtë në SHBA.
Ndër ta, ish-drejtori i CIA-s, Michael Morell ka bërë një paralajmërim të frikshëm. Në një intervistë televizive për rrjetin CBS, ai ka thënë se SHBA-ja do të paguajë një çmim të rëndë për vdekjen e gjeneralit Iranian.
Sipas tij, Irani do të hakmerret në disa mënyra, ku skenari më i mundshëm është eliminimi i një prej zyrtarëve të lartë amerikanë në shenjë hakmarrjeje. Në rast se ky skenar nuk do realizohet, atëherë skenari më i mundshëm është vrasja e civilëve amerikanë.
Kjo ngjarje, e cila është cilësuar nga disa media si “vrasja e shekullit”, rrezikon nisjen e një konflikti ushtarak mes Iranit dhe SHBA-së.
“Së pari, do të ketë amerikanë të vdekur, civilë të vdekur amerikanë. Mund të ndodhë në ditët e ardhshme në vendet ku Irani ka ndihmësit e tij. Me shumë mundësi në Irak por edhe në Liban, Bahrein dhe vende të tjera në Lindjen e Mesme. Ata (iranianët) do të kryejnë një sulm terrorist, me qëllim vrasjen e një zyrtari të lartë amerikan. Kjo mund të ndodhë kudo në botë, madje dhe në tokën amerikane”, theksoi ish-drejtori i CIA-s.
