Ish-deputetja e PD, Albana Vokshi, ka paralajmëruar se aksioni opozitar do të përshkallëzohet. E ftuar në studion e lajmeve të ‘RTV Ora’, ajo tha se protestat nuk do të ndalen, madje do të ketë një aksion opozitar të përshkallëzuar.
“Do të vazhdojë strategjia e protestave. Nuk do ndalen protestat e PD, madje do ketë një aksion opozitar të përshkallëzuar. Është ngritur një grup pune në PD, dhe të opozitës së bashkuar.
Me anë të vendimit që u mor dje, kryetari i PD dhe sekretari i përgjithshëm janë ngarkuar për të negociuar me aleatët, në mënyrë që të bisedohet edhe për aksionin opozitar. Do të ketë protesta, por edhe shpallje të alternativës së PD”, u shpreh ajo.
Vokshi përsëriti qëndrimin se PD nuk do të hyjë në zgjedhje pa u garantuar standardi për votë të lirë e të ndershme. Ish-deputetja shtoi se nuk bëhet fjalë për negocim, dhe se kushti kryesor për tu ulur në tryezë është largimi i Ramës.
“Të gjithë e kanë mbështetur vendimin për të mos hyrë në zgjedhje pa u garantuar një minimum standardesh, për votë të lirë dhe të ndershme. Nuk ka asnjë negocim për aq kohë sa Rama është kryeministër.
Duhet të ikë Rama që të mund të ulemi në tavolinë për të biseduar. Të gjithë janë dakord për vendimin që është marrë dje. Kërkohet qeveri tranzitore, garantimi i standardeve. Nuk ka asnjë hap prapa”.
