Gafa që u bë me himnin shqiptar para se të fillonte ndeshja Francë-Shqipëri ka shkaktuar reagime të shumta. Edhe pse Franca triumfoi ndaj kombëtares kuqezi, episodi para startimit tërhoqi më tepër vëmendje sesa rezultati i ndeshjes.
Mediat franceze kërkuan një prononcim për këtë rast nga ambasadori shqiptar në Paris, Dritan Tola i cili u shpreh se është një gabim protokollar që mund të ndodhë dhe nuk prek marrëdhëniet dypalëshe.
‘’Ishte një incident fatkeq. Gabimi i bërë ishte njerëzor dhe gabimet mund bëhen kudo. E vlerësoj reagimin e lojtarëve të ekipit kombëtar që nuk pranuar, në sensin e mirë të fjalës, të nisnin ndeshjen pa u luajtur Himni Kombëtar.
Falenderoj popullin francez dhe zyrtarët e lartë, të cilët kërkuan falje për gabimin. Kjo është një shenjë e miqësisë së sinqertë midis francezëve dhe shqiptarëve dhe ne i falenderojmë shumë ata’’, deklaroi Tola.
Ndërkohë, në mbyllje të intervistës, Tola tha me ironi: ‘’Të shpresojmë që ndeshjen e ardhshme që Franca ka me Andorrën të mos luhet himni i Shqipërisë.’’
