Zvicra ka arritur të marrë një fitore me mjaft polemika një natë më parë në transfertë me Irlandën e Veriut, në fazën “play-off” të botërorit “Rusi 2018”. Por fakti që arriti të fitonte me një 11-metërsh mjaft të dyshimtë ka bërë që irlandezët ta kontestojnë shumë fort këtë ndeshje. Ata nuk janë dakord për penalltinë e dhënë nga arbitri dhe besojnë se nëse VAR do të ishte i pranishëm ndeshja do të kishte përfunduar ndryshe.
Penalltia që u kthye në gol nga Rodriguez i uli shanset që Irlanda e Veriut kishte për një biletë në Botërr. Ky episod që vendosi fatin e ndeshjes është kontestuar nga mediat në të gjithë botën, ku mendojnë se ishte një dhuratë për Zvicrën.
“Ishte një penallti e çuditshme që komplikon jo pak situatën e skuadrës së O’Neil”, lexohet tek e përditshmja “Belfast Telegraph”, një artikull që ka gjetur jehonë edhe në median britanike. “Mirror” shkruan: “Një penallti e shëmtuar e vë skuadrën e Irlandës së Veriut përballë një misioni shumë të vështirë”.
Por ai që lëshoi deklaratën më të fortë ishte Johnny Evans, vëllai i futbollistit që – sipas arbitrit, – shkaktoi atë penallti. “Ky 11-metërsh është një episod edhe më i keq sesa prekja e topit më dorë të Henrysë në ndeshjen ndaj Francës në vitin 2009”, tha Evans.
E turpshme apo jo, e vërteta është që i gjithë ishulli irlandez nuk ka shumë fat me arbitrimet në ndeshjet e “play-off”-eve dhe, pas asaj që ndodhi në vitin 2009, futbolli botëror rrezikohet që të përfshihet në një tjetër skandal, që mund të evitohej nëse do të përdorej sistemi VAR.
