Shefi i energjisë atomike i Iranit thotë se vendi ka aftësinë për të ndërtuar një armë bërthamore, por nuk ka plan për ta bërë këtë, raporton një agjenci iraniane e lajmeve. Komentet e Mohammad Eslamit i bëjnë jehonë një deklarate të ngjashme të fundit nga një këshilltar i lartë i udhëheqësit suprem të Iranit. Pretendime të tilla publike nga zyrtarë të lartë janë të rralla, dhe ka të ngjarë të intensifikojnë shqetësimet mbi natyrën e programit bërthamor të Iranit. Ajo ka avancuar aktivitetet e saj bërthamore, që kur një marrëveshje që i kufizon ato u prish.
Marrëveshja e vitit 2015 filloi të shpërbëhej kur SHBA-ja u tërhoq, dhe rivendosi sanksionet ekonomike. Irani ka pretenduar vazhdimisht se programi i tij bërthamor është për qëllime thjesht paqësore, por fuqitë perëndimore dhe mbikëqyrësi global bërthamor thonë se nuk janë të bindur.
Zyrtarët perëndimorë kanë paralajmëruar se koha po kalon, për të rivendosur marrëveshjen përpara se programi i Iranit të arrijë një pikë të tillë, ku nuk mund të kthehet mbrapsht.
Sa uranium nevojitet për një bombë?
Në fjalët e tij të raportuara të hënën nga agjencia gjysmë zyrtare e lajmeve Fars, z. Eslami përsëriti komentet e bëra nga këshilltari i lartë, Kamal Kharrazi. “Siç përmendi zoti Kharrazi, Irani ka aftësinë teknike për të ndërtuar një bombë atomike, por një program i tillë nuk është në rendin e ditës”, tha z. Eslami.
Në komentet e tij të bëra për kanalin e lajmeve Al Jazeera më 17 korrik, Kharrazi tha: “Irani ka mjetet teknike për të prodhuar një bombë bërthamore, por nuk ka pasur asnjë vendim nga Irani për të ndërtuar një të tillë”.
Ka pasur shqetësime në rritje për të ashtuquajturën kohë të shpërthimit, ose sasinë e kohës që do t’i duhet Iranit për të grumbulluar uranium të pasuruar mjaftueshëm për një armë bërthamore. Në qershor, kreu i agjencisë globale të energjisë atomike, Rafael Grossi, tha se Irani mund të marrë një sasi të tillë brenda disa javësh. Shtetet e Bashkuara e vendosën kohën e shpërthimit në rreth një vit gjatë periudhës në të cilën marrëveshja bërthamore ishte e paprekur.
Megjithatë, zoti Grossi tha se posedimi i materialit të mjaftueshëm, nuk do të thotë se Irani mund të prodhojë një bombë bërthamore. Në raportin e saj të fundit në maj, IAEA tha se Irani kishte 43.1 kg (95 lb) uranium të pasuruar në 60% pastërti. Rreth 25 kg uranium të pasuruar deri në 90% nevojiten për një armë bërthamore.
Pretendimet nga Irani se ka njohuritë teknike për të zhvilluar një bombë, vijnë në një kohë kur Irani dhe fuqitë botërore janë në mosmarrëveshje rreth ringjalljes së marrëveshjes së 2015-ës.
Bisedimet disamujore në Vjenë kanë ngecur dhe negociatat e rralla indirekte midis SHBA-së dhe Iranit mbi çështjen që u zhvilluan në Katar në qershor, përfunduan pa marrëveshje.
Burimi i lajmit: BBC. Përshtatur nga Tirana Today
