Tërmeti nxori në pah një anë të errët të historisë shqiptare postkomuniste, ndërtimet pa kriter. Prej ditësh, inxhinierë dhe akademikë të ndryshëm kanë bërë thirrje për mënyrën sesi duhet të menaxhohen në të ardhmen ndërtimet.
Një prej inxhiniereve më të famshme shqiptare, Luljeta Bozo, pasi prej ditësh shpjegon fenomenin e ndërtimeve dhe lidhjen e tyre me tërmetet. Dje ajo u ka bërë një apel tjetër shqiptarëve. Ajo u ka kërkuar që të heqin nga telefonat programet që tregojnë tërmetet pasi po përhapet panik në një shkallë kombëtare.
“Kam një apel njerëzit ta mbledhin mendjen të mos i zërë paniku sepse sipas të gjithave gjasave e madhja kaloi pasgoditje do ketë derisa të çlirohet energjia nga brendësia e tokës. Ta marrim me qetësi. Mos shikoni shumë aplikacionin që është vënë. Sapo shikoni 3.1 ose 2.7 thoni obobo. Çfarë është 3.1 asgjë. Nuk është gjë fare 3.1 apo 3.5 ne ndërtuesit se quajmë gjë fare. Nuk e ndjejnë fare që kanë rënë. Nuk e dinë njerëzit, shikojnë magnitudën sikur çfarë është”, shprehet Bozo.
Tërmeti/ Flet ekspertja: Kjo është zona më problematike në Tiranë
Këto fjalë ajo ua drejtoi shqiptarëve teksa ishte e ftuar në televizionin Ora News. Bozo që prej 21 shtatorit, kur ndodhi dhe tërmeti i parë i fortë, ka bërë thirrje për ndryshimin e standardit të ndërtimeve. Sipas saj, duhet të bëhet një revolucion në këtë fushë.
“Kam një merak të madhe që ne që i kemi shprehur mendimet tona shpresojmë që diçka të ndryshojë, ose të ndryshojë shumë në mënyrën sesi ndërtohet në Shqipëri duke nisur që nga të gjitha hallkat që duhet të respektohen që nuk janë respektuar. Kjo është pasojë e kësaj pune. Duhet që specialistët më të mirë të bëjnë një draft t’ia çojnë qeverisë. Por duhet riorganizim tjetër sepse nuk funksionon kështu”, tha Bozo.
