Një investigim i BIRN ka zbuluar se Serbia ka fshehur të dhënat reale, lidhur me numrin e viktimave dhe rasteve nga koronavirusi.
Sipas këtij investigimi, nga 19 Marsi deri në 1 Qershor në Serbi kanë humbur jetën 632 persona të testuar pozitivisht për koronavirusin. Ky numër është 2 herë më shumë sesa numri zyrtar (244) i vdekjeve të raportuara në këtë periudhë.
BIRN ka zbuluar mospërputhjen e shifrave duke analizuar të dhënat e marra nga sistemi shtetëror i informacionit të Covid-19.
Serbia duket se ka fshehur edhe numrin real të të infektuarve, numri i njerëzve që u infektuan në Serbi nga 17 deri në 20 qershor ishte të paktën 300 në ditë. Ndërsa zyrtarisht u raportuan maksimumi 97 raste në ditë.
Fshehja më e madhe e shifrave duket se ka ndodhur në Qendrën Klinike në Nish, ku sipas të dhënave zyrtare kanë humbur jetën 77 pacientë. Por, nga të dhënat që publikon BIRN flitet për 243 jetë të humbura.
