Inter duket se është i fiksuar pas kroatëve. Tek zikaltërit aktualisht janë tre futbollistë të kombëtares së Kroacisë, por duket se boshti i ekipit që do të ndërtojë Marotta dhe Ausilio do te jetë i përbërë prej tyre. Në merkaton e verës ishte Luka Modric, emri më i përfolur, por që në fund asgjë nuk u konkretizua.
Ndërsa tani zikaltërit kërkojnë të afrojnë kroatin e Barcelonës, Ivan Rakitiç. Ashtu sikurse kishte paralajmëruar Calciomercato.com, Ivan Rakitiç ka zgjedhur të transferohet në Milano. Gjatë këtyre ditëve drejtuesit e lartë të Inter, Marotta dhe Ausilio, kanë takuar drejtuesit e Barcelonës, duke ofruar 35 milion euro për mesfushorin kroat (31 vjeç në 10 marsin e ardhshëm); 10 milion më pak krahasuar me kërkesën e bërë nga klubi katalanas.
Gjithnjë, sipas Gazzetta dello Sport, çështja do të jetë praktikisht e zgjidhshme me një kontratë shumëvjeçare dhe bonuse të lidhura me rezultatet e skuadrës. Rakitiç është nën kontratë me Barçën deri më 2021 me një angazhim bazë prej 5.5 milion euro të plota në vit. Interi është gati ta bëjë të firmosë një trevjeçare deri në qershor 2022.
