Të njëjtat deklarata dhe të njëjtat ngjarje, në vendin tonë lexohen ndryshe. Mjafton të bësh një monitorim të portaleve kryesore në vend, për të kuptuar se sa ‘i drejtë’ është raportimi.
Kështu, çështja kryesore e ditës së sotme ka qenë strategjia e Bashkimit Evropian për zgjerimin drejt Ballkanit Perëndimor, prezantuar nga përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Federica Mogherini.
Strategjia e prezantuar sot ka sjellë shumë reagime, ndërsa mediet e vendit tonë duket se kanë bërë një përzgjedhje të tyre, në varësi edhe të politikave editoriale të ndjekura nga redaksitë e tyre.
Madje, pati edhe tjetërsim të lajmit, teksa përmbajtja u shndërrua në një titull aspak të kuptimtë, vetëm e vetëm për të shprehur edhe një herë qëndrimin e këtyre medieve.
Fatkeqësisht, mund të numërosh me gishta ato medie që raportuan me ndershmëri, duke shfaqur qëndrimet si pozitive, edhe ato negative në lidhje me integrimin e vendit.
Duket se gazetaria është bërë më shumë një ‘papagall’ që përkthen dhe thotë atë që do, atë që i pëlqen dhe atë që i intereson, njësoj siç politikanët përsërisin si të programuar atë që lideri i tyre do dhe pëlqen të dëgjojë.
Siç shihet, kemi të bëjmë më shumë me politikë duke përdorur gazetarinë se sa gazetari të mirëfilltë. TIRANA TODAY
