Ambasadorja Romana Vlahutin tha se muajt e ardhshëm janë kyç për çeljen e negociatave të Shqipërisë me Bashkimin Evropian.
Këtë deklaratë, Vlahutin e bëri gjatë fjalës së saj në Shkollën Evropiane Verore, ku theksoi se prioritetet kryesore të vendit janë sundimi i ligjit dhe lufta kundër drogës.
“BE është i përkushtuar në përfshirjen e të gjitha vendeve të rajonit, pasi ato të jenë të gatshme, përfshi edhe Shqipërinë, pasi të kenë plotësuar reformat, të cilat do të sjellin një cilësi jete më afër Evropës.
Muajt e ardhshëm do të jenë kyç për çeljen e negociatave. Sundimi i ligjit dhe lufta kundër drogës janë prioritete kryesore.
Do të thosha që edhe Shqipëria është në një moment të mirë. Më në fund pritet të implementohet reforma në drejtësi, e cila është dhe reforma më komplekse. Ajo është gati të zbatohet në më pak se dy javë.
Integrimi i vendit nuk mund të arrihet nëse nuk jeni të gjithë të bashkuar. Shqipëria nuk e ka luksin të humbë potencialin e saj, vendi duhet të ecë përpara”, tha ndër të tjera Vlahutin.
