INSTAT ka publikuar raportin për qumështin dhe nënproduktet e tij gjatë vitit 2016, ku vihet re një rënie e grumbullimit krahasuar me 2015-ën.
Kështu, në vitin 2016, sasia e qumështit të grumbulluar është rreth 125 mijë ton duke shënuar rënie me 0,17 %, krahasuar me 2015.
Konkretisht, sasia e qumështit të lopës të grumbulluar është rreth 103 mijë ton duke shënuar një rënie me 2,25 %, krahasuar me 2015;
sasia e grumbulluar e qumështit të deles është rreth 13 mijë ton duke shënuar një rritje me 0,12 %, krahasuar me një vit më parë;
dhe sasia e grumbulluar e qumështit nga dhitë është rreth 9 mijë ton duke shënuar një rritje me 0,06 %, krahasuar me vitin 2015.
Ndaj sasisë gjithsej të qumështit të prodhuar në vitin 2016, qumështi gjysëm i skremuar përbënte rreth 35,97 %, qumështi i plotë i përpunuar 58,5 %, qumështi i papërpunuar 4,86 % dhe qumështi i skremuar 0,67 %.
Nënproduktet e qumështit:
Për sa u përket nënprodukteve të qumështit, sasia e prodhuar e djathit sipas origjinës në vitin 2016 u rrit me 5,37 %, krahasuar me një vit më parë.
Sasia e djathit të përpunuar u rrit me 9,32 %. Prodhimi i gjalpit të shkrirë ka shënuar një rritje me 56,19 %, ndërsa prodhimi i gjalpit tradicional shënoi një rënie me 15,7 %, krahasuar me një vit më parë.
