INSTAT publikoi Anketën e Forcave të Punës për vitin 2016, ku raporton se numri i personave në forcën e punës është 1.365 mijë persona.
Shkalla zyrtare e papunësisë për popullsinë 15 vjeç e lart, është 15,2 %. Për meshkujt, shkalla e papunësisë është 1,5 pikë përqindje më e lartë sesa për femrat.
Krahasuar me vitin 2015, shkalla zyrtare e papunësisë ka rënë me 1,9 pikë përqindje. Shkalla e papunësisë për të rinjtë e moshës 15-29 vjeç është 28,9 %, (29,7 % për meshkujt dhe 27,8 % për femrat).
Krahasuar me vitin pararendës, shkalla e papunësisë së të rinjve ka rënë me 4,3 pikë përqindje. Në vitin 2016, të rinjtë e moshës 15-29 vjeç të cilët nuk janë të punësuar dhe nuk janë duke ndjekur shkollën apo ndonjë formim profesional përbëjnë 30,0 % të të rinjve gjithsej.
Sipas INSTAT, të punësuar janë 1.157 mijë persona, ku femrat përbëjnë 43,8 % të të punësuarve dhe meshkujt 56,2 %.
Numri i të papunëve vlerësohet të jetë 208 mijë persona, ndër të cilët 41 % janë femra dhe 59 % janë meshkuj.
Shkalla e pjesëmarrjes në forcat e punës për popullsinë 15-64 vjeç është 66,2 %. Për meshkujt e moshës 15-64 vjeç, shkalla e pjesëmarrjes në forcat e punës është 15,8 pikë përqindje më e lartë sesa për femrat.
Shkalla e punësimit për popullsinë 15-64 vjeç është 55,9 %. Shkalla e punësimit për femrat është 49,7 % dhe për meshkujt 61,9 %. Sektori bujqësor dhe sektori i shërbimeve kanë përqindjen më të lartë të të punësuarve me përkatësisht 40,2 % dhe 40,4 % të të punësuarve gjithsej.
Në vitin 2016, rezulton se 41,2 % e të punësuarve janë të punësuar me pagë, 34,9 % janë të vetëpunësuar (punëdhënës ose të vetëpunësuar pa të punësuar të tjerë) dhe 23,9 % janë punëtorë pa pagesë në biznesin e familjes.
