Përgjatë 2 ditëve të fundit, Inspektorati Shtetëror Teknik dhe Industrial në rajonin e Tiranës, kanë inspektuar 130 pika karburanti.
Nga këto kontrolle, dy pika tregtimi janë bllokuar duke mos u lejuar të ushtrojnë aktivitetin, pasi u konstatuan me shkelje sa i takon cilësisë së produktit që tregtohej por edhe sigurisë.
Në një prej inspektimeve, morën pjesë edhe ministrja e Infrastrukturës dhe Energjisë, Belinda Balluku, si edhe kreu i Inspektoratit Shtetëror Teknik dhe Industrial, Admir Abrija.
“Menjëherë pas analizimit dhe daljes së rezultateve nga ana e Inspektoratit Shtetëror Teknik dhe Industrial është marrë masa e bllokimit të këtij produkti. Gjithashtu ka filluar inspektimi online ku pas përfundimit kemi marrë edhe masën e penalitetit me 15 milionë lekë për secilën nga dy pikat e shpërndarjes”, tha Abrija.
Nga ana tjetër, Balluku u shpreh se ky aksion i gjerë është një tjetër provë e vendosmërisë së Qeverisë Shqiptare për t’i dhënë fund informalitetit, si atij fiskal ashtu edhe atij cilësor
“Është e rëndësishme që të gjitha subjektet të kuptojnë që ka zero tolerancë sa i përket informalitetit qoftë ky fiskal, qoftë ai cilësor. Është shumë e rëndësishme që ne të kemi një bashkëpunim të mirë ashtu siç kemi dhe sot këtu mes Inspektoratit Teknik dhe Drejtorisë se Përgjithshme të Doganës. Janë konstatuar shkelje sa i përket cilësisë, kemi marrë masa. Fakti që sot përballemi me një numër më të vogël shkeljesh, në 130 subjekte të kontrolluara gjatë natës së mbrëmshme kanë rezultuar vetëm dy me probleme, tregon se lufta kundër informalitetit është duke dhënë rezultate shumë pozitive dhe të rëndësishme”, tha ajo.
Së fundmi, Balluku i bën thirrje bizneseve se do ketë sërish inspektime dhe se nuk do të falet asnjë subjekt që konstatohet me shkelje.
“Unë u bëj thirrje të gjithëve. Ne do jemi në terren. Të mos përballemi me situata të tilla. Nuk është synimi ynë të kapim sa më shumë subjekte. Synimi ynë është të kontrollojmë këdo dhe të kemi rezultate të mira dhe të pranueshme sipas kritereve, por në rast se këto kritere nuk përmbushen do ketë pasoja kështu siç ka pasur ky subjekt sot i cili është bllokuar dhe nuk do të mundet të funksionojë”, nënvizoi ministrja Balluku.
